«Edo dena edo ezer ez»

Galde egin dit nire homonimoak, etxeko ispiluetatik bertze aldean agertu ohi zaidan horrek, zer demontre egiten dudan kanpaina honetako zurrunbiloan, eta hain trakets, nik neuk irabazi nahirik gabe bezala aurkeztuz ene burua mintzatu behar dudan leku bakoitzean, hain zuzen ere politikariei ez dagokien bezala…

Ez nau ezagutzen. Eta saiatu naiz hari azaltzea eni buruzko iritzietan oker dagoela ia beti bezala, ez al zara konturatzen nire parte hartzea handinahiak bultzaturik dagoela, jakin ezazu baldintza zehatz bat jarri niela eskatu zidatenei senatari gai zerrendan sartzeko, hirugarren lekuan, azkenekoan alegia, ni jartzea, baina inolaz ere ez senatari atera nahi ez dudalako, alderantziz baizik, badakidalako errazegia izanen litzaidakeena Nafarroa Bairen lehen aukera izanen banintz, baina ez, ez nago prest ni neu bakarrik hautatua izateko, ez nago prest Koldo eta Tere gabe Madrila joateko, izan ezazu garbi, edo hirurok Madrilen edo ni etxean…

Alferrik. Kar, kar hasi zait beiraren bertze aldetik, kar, kar burlaizetsu, zu zara zu!, burutik jota zabiltza…

Saiatu naiz bertze bide batetik konbentzitzen, baina ez al dakizu «Edo dena edo ezer ez» goiburu zahar horren jarraitzaile sutsua naizenik?, ez al dakizu denak ez duela zertan izan guztia?, ez al dakizu ezerezaren kontrakoa ez dela guztia, bai aldiz dena, badena hain zuzen, guztia edo zertxobait izanik ere?, nire handinahiak bultzatu nau, baiki, zerrenda honetako partaide izatera, ene indar guztiekin horren alde agertzera, Nafarroa Baik zerbait ongi ulertu baldin badu hauxe delako, berak ordezkatu nahi duen nafar gizarte zatia, kolore anitzetako hori, hizkuntza eta hizkera ezberdinetako hori, imajinario desberdinetako hori, mafia anitzek deusez bihurtu nahi duen gizarte zati zabal hori orain arteko ezerezatik atera behar dugula ulertu duelako, eta, berez, ezerezatik ateratzea dena lortzea delako, jadanik Nafarroa Bairi esker baden zerbait den bezala, eta horri eutsi nahi diodalako handinahi lotsagabe nauzun honek, handinahirik falta al deritzozu horrek?, ez al deritzozu dena guztia-rekin nahastea, «Edo dena edo ezer ez» goiburua «Edo guztia edo ezer ez» bertze horrekin bat egitea, horixe dela handinahirik falta, are amore ematea, ez al zaizu iruditzen «Edo guztia edo ezer ez» lelopean abstentziora jotzeak mafia horrek nahi zaituen ezereza, ezdena bihurtzen zaituela?...

Bixente Serrano Izko,
idazle eta historialaria,
Senaturako hirugarren hautagaia.

Comentarios

Eskerrak zuri, Bixente,

Vie, 2008-03-07 02:49 — Metete (no verificado)

Eskerrak zuri, Bixente, argudioetan sakondu izanagatik. Asuntu hau iritzi artikulu soilaren dimentsioa gainditzeak elkarrizketa bilakatzeko balore handiko gauza da niretzat.
Lizarra: hauteskundeen izaerari buruz planteatu duzun ikuspuntuarekin ez nator bat. Hauteskundeen emaitzak, ikerketa soziologikoak ez bezala, aldaketen ondorio izan daitezke (aldaketa ezarena izan daitezkeen bezalaxe) baina baita aldaketa edo aldaketa ezaren arrazoi aldi berean. Kausalitateak norantza bikoitza dauka, hots, ondorioak arrazoien efektu dira efektu berrien arrazoi diren hein berean.
Hauteskundeen emaitzak egoeraren ispilu dira, hein xume batean, mafiaren interesen mesederako antolatua dagoen errealitatearen argazki interesatua, esango nuke. Baina emaitza horiek errealitate horretan eragiteko tresna bilaka daitezke ere. Bozkak nahiz abstentzio aktiboak ez lukete baliorik bestela, nolabaiteko balio deskriptibo bat, besterik ez.
Eztabaida interesgarria, zinez.

responder

Mafiari buruz. "Metete"k

Vie, 2008-03-07 00:46 — Bixente (no verificado)

Mafiari buruz. "Metete"k dioena, guztiz arrazoiduna eta eskertzekoa nire aldetik. Joko bat egin ohi dut nik nire izenarekin agertu diren idazkiekin: berriro irakurtzean gustukoa dut ez hartzea nireak izanen balira bezala, eta jada idazlearenak ez diren irakurle baten begiekin ikustea. Ba, nire oraingo irakurketa proposatzen dizut: mafiak ez dira definitzen bakarrik euren metoduen arabera, baizik eta baita euren helburuen arabera ere; eta mafien helburuak, beti, irabazi handikoak dira, diru irabazi handikoak, jakina; euren botere, indar eta mota guztietako presioaz (aitakerietan ere islatzen direnak barne) baliatzen dira jende arruntaren dirua bildu eta poltsikoratzeko, gero euren erara banatu edo/eta inbertitzeko, euren interes partikularren arabera. Mafietan, mafia politikoak eta botere politikoaz balia daitezkeenak dira arriskutsuenak, eta horiek dira gutxien interesatzen zaiena jende arrunta (herritarrak) euren kabuz antola daitezen, autonomo bihur daitezen euren erabakietan eta jarreretan. Mafia horiek dira, hauteskunde giroetan, beraiengana erakarri nahi dituztenak guztien botoak, lakio eta maltzurkeria guztiak erabiliz, eta erakarri ezinak guztiak abstentziora, konputoetatik ezabatzera, zentzu horretan kasurako ezerezara, bidali nahi gaituztenak. Hortaz, mafia horietatik kanpokoen abstentzioak mesederik baizik ez die egiten mafiako buruei. Irakurketa bat da. Zuk bertze irakurketa mota bat ikusten badiozu testuari, guztiz libre zara hori egiteko.
Zerbait izatea edo ezer ez izateari buruz, zerbait izateko edo ezer ez izateko moduei buruz, modu horiek parte hartze politikoarekin eta hauteskundeekin, instituzioekin, mugimendu sozio-kultural-humanitarioekin-eta duten loturari buruz, ez dut uste tonto zarenik, eta zuk zeuk badituzu zure usteak; jakin, ongi dakizu azken finean mugimendu horiek, guztiz positiboak eta eraginkorrak izanik ere, azken finean diru publikoaren erabilera justuagoa, solidarioagoa eta emankorragoa eskatu behar dutela. Ikusi zuk zeuk merezi duen ala ez instituzioetako partaideen aldakuntzak (ahal den neurrian), mugimendu horiek hobe gara dezaten euren helburuak.

Ene uste apalean, eta barka

Jue, 2008-03-06 20:47 — metete (no verificado)

Ene uste apalean, eta barka atrebentzia, mafia=arerioa; baina tira, iritzi artikulu bat da, maximalismoetatik aldenduta, zalantzak plazaratzen dituena gehienbat, burutazio intimoak... baina interpretazioak norberarenak eta libreak dira, noski, hizkuntza erlatiboa eta subjetiboa da aldi berean...

Agur bero bat guzioi!

Ba tontoa izango naiz, baina

Jue, 2008-03-06 20:00 — Anonymous (no verificado)

Ba tontoa izango naiz, baina zalantzarekin jarraitzen dut. Zein da mafia, abstentzioa eskatzen dutenak ala eserleku bila dabiltzan batzuk? ala biak?
-
Izateko, baina ez bakarrik zure etxean izateko aukera aunitz daude. Izateko eta parte hartzeko, izateko eta aldatzeko. Aldaketa ez dator hauteskunde batzuetatik, etortzekotan, hauteskundeen emaitzak dira aldaketaren ondorio eta ez arrazoi. Eta hauek izateko kalean, auzoan izan behar. Izan eta parte hartu, izan eta aldatu ez dira bozkatzearen sinonimo.
-
Lizarra

Zer mafia? Hain zuzen ere,

Mié, 2008-03-05 23:50 — Bixente (no verificado)

Zer mafia? Hain zuzen ere, nafar gizarte zati zabal eta ireki hori ezabatu nahi duena, eta abstentzionismo aktiboaren kalezulora jendea joateaz pozten den mafia; idazkiaren testuinguruan, nik behintzat berriro irakurtzean, ez daukat dudarik zein mafia den hori.

Izateko, jakina, ez dugu zertan egon ez Madrilen, ez Nafarroan, ez instituzio batean ere, ez eta inolako mugimendu sozio-kultural-humanitario batean ere: jende asko eta askok, bere etxean edo auzoarenean, edo tabernan, edo dantza-lekuetan, edo lapur-bulegoetan... egotearekin, nahikoa eta gehiago du izateko, izan.

Os volveré a votar cuando

Mié, 2008-03-05 21:04 — Gorka (no verificado)

Os volveré a votar cuando hagais un correcto uso del dinero público. Momentuz ez dut bozkatuko.

"are amore ematea, ez al

Mié, 2008-03-05 20:25 — Anonymous (no verificado)

"are amore ematea, ez al zaizu iruditzen «Edo guztia edo ezer ez» lelopean abstentziora jotzeak mafia horrek nahi zaituen ezereza, ezdena bihurtzen zaituela?..."
-
Ez dut argi zer erran nahi duzun horrekin, nor da mafia testuan? abstentzioa erabakiko banu ezereza bihurtuko ninduke ze mafiak? nik uste hauteskunde hauen aurretik bazinela norbait, Bixente eta ondoren ere izanen zarela.
-
Halaxe ere uste dut ez nauela abstentzioak ezdena bihurtuko, izateko era asko daude, ez bakarrik senatari. Etxean, lanean, kalean euskaraz arituz, sinadurak bilduz, auzoa kontzientziatuz, ekintza eta ekitaldi ezberdinak antolatuz eta parte hartuz, elkartasun sarea zabalduz e.a.. Izateko ez gara zergatik Madrilen izan behar (eta eskerrak!). Lagunduko lukeela, nik uste baietz, baina izanetik ezerezera bada tarte zabala eta bitarte horretan Nafarroaren alde lan egiteko aukera aunitz dago.
-
Lizarra (bozkatzekotan, senatarien artean zure "X" ziurra Bixente!)